السلام عليكم ورحمة الله وبركاته

المشكلة اني من كثر ما اصابني من احباط ماادري كيف ابدأ ولا كيف اتكلم عن اللي صاير من حوالينا
اكثر من سنتين .. وانا ابحث وراء الامل او الوهم اللي رسموه لينا تحت مسميات كثيرة مثل
" مسكن لكل مواطن "
" تسهيلات تناسب كل مواطن"
"تمويل وتقسيط بشروط ميسرة "
" نحن نعمل لصالح المواطنين ذوي الدخل المحدود" .... الخ

والنتيجة بعد كل هالانتظار اشوف انه كله فرقعه في الهوا .. كلام ماادري اذا كان هدفه انه اللي عندهم ملايين تزيد وتصير بلايين ولا هي باب وانفتح لمزيد من النصب والاحتيال .. واضعفها هو التلاعب بأحلام وآمال الناس وتحطيم لاحلامهم

شركات تقسيط ... شركات تمويل ... برامج ... وبرامج كلها حبر على صفحات الجرائد والانترنت والنتيجة ............... => احبااااااااط

حكايتي اكيد حكاية ناس كثير مثلي ... زيارة لاحدى الشركات او البنوك اللى تعلن عن برامجها وتسهيلاتها وتكتشف انك كنت ضحية كذبة او تلاعب بالالفاظ يختبىء ورائها الكثير من الغموض اللي لما ينكشف تلاقي انه المسكن متوفر فقط لذوي الدخل غير المحدود واللي يمكن كمان فوق المتوسط بكثير

غير الشروط التعجيزية ... كفيل ... دفعة اولى مبلغ وقدره ... قسط شهري يمكن اكثر من دخلك ... نسبة تجعل قرضك الضعف او الضعفين ... غير انك في الاخر ماتعرف اذا الموضوع حقيقي او يمكن منصوب عليك ويمكن تخسر المبلغ البسيط اللي تملكه

يعني مثلا اروح لشركة او بنك .. اقدملهم اثبات دخل عبارة عن راتب 7000 ودخل تاني عبارة عن راتب تقاعد ورثة يخصني لوحدي قدره 6000 غير اني كمان اقدم اثبات بصك عمارة املكها وعقود ايجار تثبت دخل سنوي 120000 الف
ورغم كده .. يقولو .... لا مو كفاية .. الراتب مايسمح ... والدخل التاني ماله اهمية ... والمصيبة الاكبر انه بعضهم يطلبوا افراغ العمارة كضمان ...... اما عجيبة .. يعني ياخذون دفعة اولى مبلغ وقدره ... والعقار الجديد يظل ملكهم الين السداد والعمارة تفرغ لهم كمان ... لا واقولهم طيب تكون العمارة رهن .. لا مايعجبهم .... لازم افراغ .... يعني لو صار ماصار اطلع منها يامولاي كما خلقتني ..........

سؤالي هنا او تعجبي .. اذا كل اللي قلته هذا ماكفاهم .. ياترى ايش معنى ذوي الدخل المحدود ... يعني يبغوا دخل اكثر من 30000 شهري ولا ايش هو المقصود من اللي قاعد يصير .. وهذا انا كل اللي طلبته شقة تمليك مايزيد ثمنها عن 600000 الف .. اجل لو طالبة فيلا بمليون او اكثر هذا اذا كان فيه اصلا مع ارتفاع الاسعار كان ايش صار ..

هذا كله كوم وحكاية الكفيل كوم تاني ... لا وكمان لازم يكون من القرايب ... يعني قمة التعجيز والاحباط

يعني كل اللي صاير دعاية وبس عشان نطلع من دوامة الاسهم ندخل في بركان العقار .. ونعيش ونموت بالايجار والمرمطه والبهدلة

انا عارفة اني يمكن طولت عليكم بس من قهري ومن الابواب اللي انسدت في وجهي برغم الدخل اللي عندي .. ماادري لو احد ماعنده غير راتبه وبس ايش حاله اذا هذا حالي

احس انه مافي حل ومافي احد يساعد احد ... مافي حلول ولا حلول وسط ... ولا مرونة في التعامل ... الين ماصار واضح انه اللي صاير هو مكاسب تزيد في ارصدة اللي مو ناقصهم ... ومسكن لكل مواطن عبارة عن مدفن لاحلام المواطن والمواطنة


ياريت اللي عنده رد مايبخل واللي عنده تعليق لا يبخل ... واللي عنده حل لا يبخل .